Elwetritsche

Eine Wahre Begebenheit aus Alt-Lambrecht

Von der Lambrechter Heimatdichterin Elisabeth Schneckenburger

Gemiedlich inne Wei(n)wirtschaft,

im Eck, am runde Disch,

do sitzen alle Owend fascht

die Schdammgäscht unner sich.

E biedrer Mann vum Schwooweland,

der setzt sich oft dezu, –

sie räächen sich die Brurerhand –

„Prost Gottlieb“ – Du uff Du.

Der schdoßt mit a(n), noch gilt sei Lob

ag unserem Pälzer Wei(n).

De dridde Schobbe leert de Schwoob,

des muß begosse sei(n).

Jetzt sagt der Baschdl: „Liewe Freind,

es war doch ausgemacht,

mer gehen, solang de Mond noch scheint,

uff Elwetritsche-Jagd“.

Was Elwetritsche – Gottlieb froogt,

des hot’r noch nit g’heert,

ja Freind, in unsrer Pälzer Sprooch,

bischt halt noch nit belehrt.

Des is e seltni Vochelart

in unsre Wälder drauß,

glickt heit, wie immer uns die Jagd,

gebbt’s morge do de Schmaus.

Hoscht Luscht Gottlieb, geh norre mit,

des will’r ag so gern,

do nemmscht de Sack, schdeckscht ei(n) de Schdrick,

unn tragscht die Schdurmladern.

Unnalles annre machen meer,

ball geht die ganz Baddie

nuff in de Wald unn kreiz unn quer

bis noh zum Gibbel hi(n).

Halt, sagt de Baschdl, meer sinn do,

die Bääm henn Nescht an Nescht,

ich hab gedenkt mer machen’s so

for Dich Gottlieb wär’s Bescht:

„Bleibscht schdäh do im Ladernelicht,

de Sack hebscht uff debei,

unn rufscht mit uns fescht, „tritsch, tritsch, tritsch,

so lockt mer se herbei.

Meer klatschen noch dezu wie doll,

dann kummen se im Nu

unnsehscht Gottlieb, de Sack is voll,

dann bindschden dabber zu!.

Unn tritsch, tritsch, tritsch und glatsch, glatsch, glatsch

schallt’s durch de nächtlich Wald,

doch schwächer wird des tritsch und glatsch

bis’s schießlich ganz ve®hallt.

Die Männer fään sich, s‘ hott geglickt,

jetzt awwer schleinigst hääm,

sie sähen noch e gutes Schick

de Lichtschei(n) durch die Bääm.

Allää im Wald de Gottlieb schdeht

unn merkt de Schawwernack,

o, wann ‘r jetzt de Baschdl hett

der wer im Nu im Sack.

Er schmeißt den Sack in seiner Wut

ag gleich ins negscht Gebisch,

daß noch de Mond schein des is gut,

weil’s Middernacht schunn isch.

So sucht er sich ag mit viel Glick

unn mid’re Schdurmladern

dann aus’m diefe Wald zurück –

e Schdunn liggt’s Schdäddel fern.

Sieht, in de Gaschdschubb is noch Licht,

wie er die Deer uffmscht,

do ruft’s am Schdammdisch: Tritsch, tritsch,tritsch“

unn alles hot gelacht.